الساعة 8 الصبح..مثل عادتي بتخانق مع الارق...كل ليلة بيجي اخو الشلن بفتح معي موضوع شكل..مرة عن التعليم مرة عن الشغل مرة عن حرب غزة..اليوم هلل صاحبي الارق بعد ليلة دراسة طويلة على موسيقى الرحابنة..
عم بذكرني صاحبي الارق بمشهد صار معي قبل كم يوم ما عم بروح عن بالي...كنت بسخنين عشان اعمل فحص دم..كنت لابسة فستان اسود وقعدت مثل الشاطرة على الكرسي استنى دوري متل باقي الناس..
وحدة من الممرضات مرقت عقبالي ورمتني بنظرة مع عقدة حاجبين ...كانت نظرة تهذيب..كان معناها اقعدي منيح.
فتت بالصفنة دقيقتين طلعت منها لما نادتني الممرضة الثانية افوت اعمل الفحص..
الشعور اللي انتابني اول 10 دقائق كان شعور بالاحراج..تحول بعدها لشعور بالاشمئزاز..يخلف عليكي خيتا..رجعتيني 15 سنة لورا..رجعتيني طفلة خجولة محرجة وساذجة عم بقولوها الكبار كيف تقعد...
طب انا اليوم كبرت ولسا بسمع هيك ملاحظات...ايش هاد بعني؟ اني بنت-كبيرة؟
يمكن بنت حسب معايير معينة وكبيرة حسب معايير اخرى
كبيرة ليش؟ لاني كمان اسبوعين ببلغ ال 24 سنة؟
دائما مسالة الجيل كانت مصيرية بمجتمعنا..لحد جيل معين لازم نكون فايتين على الجامعات ومتخرجين..واذا انت صبية الحقي حالك وتجوزي قبل ما تروح عليكي..بعدين بتعنسي وبعدش حدا يطلع عليكي..
الاشي المضحك اني اخر سنة عم بحس حالي عم برجع بنت...اصح اقول عم برجع البنت مع ال التعريف..البنت اللي كانت متمردة..اللي هي انا..متمردة على المسلمات الاجتماعية...
بس هاي البنت اليوم انضج واقوى بحكم تجاربها..
ليش؟؟؟ ليش قيمتي مرهونة بارتباطي برجل؟؟؟
شو راح تسوى علاقتي بهاد الرجل اذا ما كان عندي كيان مستقل واكتفاء ذاتي؟
ليش لازم نسمح للمجتمع يحدد النا رغباتنا؟
هاي رغباتي انا ! اذا رغباتي بدهاش تكون الي وعشاني شو بضللي ؟
على عتبة ال 24 انا بديش اكون امراة متزوجة..انا بدي اكون امراة حرة ! انا بدي اكون سيدة نفسي ورغباتي !
وكرمال عيونك يا مجتمعي راح اقعد كيف بدي، امشي كيف بدي، البس كيف بدي، احكي كيف بدي، اضحك كيف بدي، انبسط كيف بدي، واحب كيف بدي!
ايوا احب كيف بدي!
حب ما بعرف المظاهر الزائفة ولا الالقاب التافهة ولا المال اللي مالو قيمة والعادات اللي اصلها مش مفهوم والطقوس اللي ما الها لزوم ولا الدين اللي ما الو حاجة!
بدي اخلي الحب هو ديني !
وحبي هو حبي لكلشي حلو بالحياة من دون اي تعقيدات !
حبي لاهلي..لاسيل وام اسيل وابو اسيل..لنردين وبراء وطيوب..
حبي لاصحابي
حبي للموسيقى والفن..حبي لانين الناي وطنطنة العود
حبي للبحر والطبيعة والسما الزرقا
حبي للرومانسية والعاطفة
حبي لفلسطين
حبي للحرية
حبي لنفسي وانوثتي
حبي للجمال وكلشي حلو
حبي للحياة
