هاي مكنتش اول مرة !
مش اول مرة حدا من طلاب مدرسة الحليصة بسالني اذا انا مسيحية ولا مسلمة..بس هاي المرة السؤال جابني قاعدة...بكل معنى الكلمة
- مسّ انت مسلمة ولا مسيحية؟
- انا انسانة
- اييي فاهمة بس بشو بتامني بمحمد ولا..
- بامن كمان بالمسيح وكمان بمحمد
وانا احكي الجواب اجا عبالي ارمي حالي من الشباك..قال يعني بديش اعطيها الجواب اللي بدها اياه بس برضو جوابي مكنش صريح!!! انا ديني مش الاسلام ولا المسيحية!! بس مش طالع معي اقلها هيك! كيف يعني بدي افهم بنت صف ثامن انو في امكانية تانية..بنفع ما تتعرفي هون او هون !
- ايييي انت مسلمة صح؟
- مش راح اقلك :)
- زيحي شعرك شوي مسّ
ما استوعبت شو هاد الطلب فكرتها مفكرتني لابسة صليب قلتلها هاد مش صليب
- بعرف بدي اشوف جوزتك..بقدر اعرف اذا مسيحية او مسلمة من جوزتك
برضو ما استوعبت...
- شو خص؟؟؟ طب شو فارقة معك اذا مسلمة ولا مسيحية لي هلقد مهم تعرفي؟
- مش مهم..بس هيك حابة اعرف.....طب بتوكلي الملوخية خشنة ولا ناعمة؟
- مش راح اجاوبك :)
ضحكتني...!!!! شنص انو اكلة ام اسيل المفضلة هي الملوخية ومن وانا صغيرة لمستني انو الاسلام بعملو الملوخية ناعمة والمسيحية خشنة..فاجئني السؤال...ضحكني..ما العنك يا بنت..بنفس الوقت انقرصت...السؤال حرك فيي اشي..اشياء !!!
ما انتهت القصة هون...اليوم كان اول مرة باخد السيارة على الشغل...صورة اسيل على السيارة..شافتني البنت وانا مروحة اركب السيارة... بتقلي شايفة عرفت انك مسلمة..قلتلها بس انا ما جاوبت على سؤالك..بتقلي علم فلسطين و"الشهيد البطل"...
تبسمتلها وسالتها ايش يعني ما بنفع المسيحي يكون وطني؟ بتقلي مبلا المسيح مهو خلق بفلسطين بس خلص انت مسلمة انا بعرف..قلتلها رغم كل هاد مش راح اجوابك على السؤال...لاطفت شعرها وركبت السيارة....كل الوقت اللي كانت هاي البنت تحكي معي فيه كان في ابتسامة على وجهي...اسئلتها لو اجت من حدا تاني اكيد كانت بتستفزني بشكل كبير..بس هي..حبيتها..حنيت عليها..يا الله ما ابسطك !
شفت المجتمع بعينيها ! ذكرتني بكل الغضب اللي جواتي!
هاي الطفلة اللي سالتني عن الملوخية بكل براة هي مراية لمجتمعي واهلي..انتواللي بتخلو هاي العقد حاضرة بوعينا !!! انا مصدقتها انو مش مهم بس حابة تعرف شو..مهو لازم تقَولبِني متل ما علموها وتشوف اذا بشبه باقي الاسلام او بختلف عنهن...متاسفة اخيب ظنك عزيزتي...
كلنا كبرنا مع الاعتقاد انو احنا مش عنصريين...وحدة وحدة وطنية اسلام ومسيحية منردد بالمظاهرات...
انا عندي ملان صحاب مسيحية ربينا مع بعض واكلنا من نفس الصحن ...الياس زي اخوي وبحبو بس لحد اختي...اذا بتقرب من اختي يا ابن *** بلعن دينك... اكلنا من نفس الصحن بس منجوزش اختي لمسيحية...
انا مش عنصرية بس انا مش مستعدة اطلع مع شاب مسيحي..هيك كنت اقول دايما لحالي..مفش عندي طاقة احارب المجتمع وبديش ازعل اهلي...حواجز حواجز حواجز...ممنوع ممنوع ممنوع...ليش ليش ليش؟!؟!؟!؟!؟!؟! شو السبب؟!؟!
ما بنسى لما كنت بصف ثان ثالث وزارتنا صديقة امي من ايام لما كنا ساكنين بحيفا..وهي عنا طلعت على الغرفة فوق تصلي...سالت امي "يما ليش خالتو غزالة مسلمة؟" هاي الانسانة بعرفها من اول يوم وعيت فيه عالدنيا ومع هيك ولا خطر ببالي اذا بتكبّر او بتصلّب..وهيك علموني اهلي..احب كل الناس...صح؟ مش بالزبط..منرجع للحب بحدود..!
الحلو انو الي فترة بحالة ركود فكري وما كتبت ولا خاطرة ولما شغلتلي البنت بالي كل اليوم وقررت انو اكتب..التقيت صدفة "بالناس" اللي كانوا المحفز ابلش اكتب اول مرة...بعد ما كانلي فترة طويلة مش شايفيتهن...ناس معرفتي الهن خلتني ارفش المسلمات والحواجز ببطنها...يوم ما عرفت انو لا الاسلام ولا المسيحية ديني...انا ديني الحب !
ملاحظة: كتبت الخاطرة بلغة الاسلام ولكنها تعني جميع الاديان على حد سواء.
