- هاد انت؟ معقول؟ لا مش ممكن...
- ليش متفاجاة...احنا عايشين بيناتكو
- بس انت...
- ولو الي 10 سنين مش مروح عالبيت...بعدو البيت كيف مهو؟
- لا..كتر البنى اللي انبنى من داير حجب عنو الشمس ومنظر الجبال الخضرا..حتى البيوت بتفقد حربتها..
- اكيد بتكون غرفتي معباة غبرا
- لا..ابدا..الوالد بنام وبصلّي فيها...
- والغرفة اللي تحت شو صار فيها
- براء خلص مدرسة واستقر فيها..متل ما انت عملت بالزبط..
- براء...شو اخبارو؟
- صار زلمة...دايما بسمعك بضحكتو وبحسك بمزحو..نفس الصوت انت واياه..ونفس حس الفكاهة...بس هو سحب طول اكتر منك
- وامي؟
- صارت جدة
- عنجد؟؟؟
- ههه اه عنجد...مش متخيل نردين امّ صح؟ انا كمان اخد معي وقت استوعب الامر
- يعني صار الها اسم تاني؟
- بنادوها ام الطّيب..بس بعدها محسوبة على العاصلة ما تخاف..
- وهالطيب كيفو؟ قديش صار عمرو؟
- سنتين..طيوب على الاخر...بشبه نردين كتير..تقول هيي وعمرها سنتين..بس اشقراني طالع..هاي الجينات اكيد مش منا
- وابوي؟
- بعدو الوقار والهدا بحد ذاتو..مع انو العمر بلش يبان علي..
- شو صار بملف الشهدا؟
- تسكّر
- يعني تحاكموا القتلة ؟!
- ومين بدو يحاكمهن؟ الجلاد من وينتا بحاكم حالو؟
- والمظلوم ما بعرف يطالب بحقو يعني؟
- لي..في قسم اخد حقو...بالاموال..صاروا الشهدا يتقدرو بالمال كمان..
- يعني الناس نسيت رسالة الشهدا؟
- شعب متل شعبنا ما بقدر يحمل رسالة شهدا...مين بدو يطالب بالحق ويحارب الظلم؟
الزلمة اللي بضرب مرتو بالبيت؟
الاخو اللي بقتل اختو على خلفية الشرف؟
الوالد اللي مش ملاقي يطعمي ولادو؟
ابن ال 10 سنين اللي حامل سلاح؟
الشاب اللي بمس بكرامة بنات الناس؟
النساء اللي بسلمو حالهن لظلم عائلاتهن؟
رجال الدين اللي بستغلو الدين ليفسخو بين الناس؟
المسلم اللي بكره اخو المسيحي؟
القيادة اللي مدفية كراسيها وجيابها؟
الختيار المزتوت ببيت العجزة؟
الاخ اللي متزاعل مع اخو على قضية ارض؟
- طب وسوار ؟! ما سالتك عنها
- انا سوار..مش عارفني؟ مهو انا كمان مش عارفتني...من كتر ما الاحوال تغيرت بطل الواحد يعرف حالو...
وحدها ملامح الشهدا ما بتتغير يا خيّي..
" يا ورق الاصفر عم نكبر عم نكبر الطرقات البيوت عم تكبر عم تكبر...
بتخلص الديني وما في غيرك يا وطني بتضلك طفل صغيّر... "
26.8.10
01:38 am
* الحوار مع اخي الشهيد اسيل عاصله
